Бүгүн министрлер кабинетинин жыйынында УКМКнын башчысы Камчыбек Ташиев коррупциялык иштерге барганы үчүн аткаминерлер катуу жазага тартыларын эскертти.
Ал белгилегендей, коррупцияга каршы күрөш уланат. Анын айтымында, жарым жылда өлкө бюджетине 6 миллиард сом кайтарылган.
«Тууганчылык, жердешчилик – иштебейт. Жумуштан бошотулгандан кийин эч кандай мыйзамдуу жоопко тартылбайт деп күтпөңүз. Биз сени кууп жетип, жоопко тартабыз. Ошондуктан, мамлекеттик кызматка кирүүдөн мурун ойлонуңуз. Эгер парасыз иштей албасаң, анда мамлекеттик кызматка орношпогонуң жакшы. Баарыңар акылдуусуңар, билимдүүсүңөр, бизнеске же башкага барасыңар. Мамлекеттик кызматта иштегендин кесепети менен жакындарыңарды кыйнабагыла», – деди Камчыбек Ташиев.
Улуттук коопсуздук боюнча мамлекеттик комитеттин башчысы буга мисал катары Жаратылыш ресурстар министрлигинин экс-министри Динара Кутманованын (КРнын мурдагы жаратылыш ресурстары, экология жана техникалык көзөмөл министри) ишин келтирди.
«Бул жерде Динара Кутманова отурган. Аларга жылына бир нече долбоорлорго Кумтөрдөн 4 миллион сом бөлүнгөн, бирок алардын бири да натыйжа берген эмес. Алар өздөрүнүн гана кызын, эже-сиңдисин, досторун жалдашкан», – деди ал.