Кытайдагы жер титирөөдөн каза болгондордун саны 111 адамды түздү. Бул тууралуу Синьхуа басылмасы жазды.
Кытайдын Сейсмологиялык түйүндөр борборунун маалыматы боюнча, жер титирөө 18-декабрда Пекин убактысы боюнча саат 23:59да болуп, гипоборбор 10 чакырым тереңдикте жайгашкан.
Жер титирөөнүн очогу Кытайдын түндүк-батышындагы Люгоу кыштагында болгон. Күбөлөрдүн айтымында, жер титирөөдөн үйлөр, жолдор жана башка инфраструктуралар жабыркаган. Бир катар айылдарда электр жарыгы жана суу үзгүлтүккө учурады.
Акыркы маалыматтар боюнча жер титирөөнүн кесепетинен 111 адам каза болгон. Издөө-куткаруу иштерин жүргүзүү үчүн кырсык болгон жерге 580 куткаруучу, 88 өрт өчүрүүчү унаа, 12 издөөчү ит жана 10 миңден ашык техника жөнөтүлгөн.