Аламүдүн капчыгайында дайынсыз жоголгон 28 жаштагы жаранды издөөгө 19-январь күнү, саат 08:00дө жалпы 312 адам чыкты. Бул тууралуу ӨКМден билдиришти.
Анын 188и Өзгөчө кырдаалдар министрлигинин куткаруучулары, курамында кинолог 10 дрон менен ИИМден 120 кызматкер 2 дрон, Инсараг тобунун 4 адиси 2 дрон менен издөө ишин алып барышат.
14-январь күнү 1996-жылы туулган Маматалы уулу Мухамедаалы үйүнөн чыгып кеткен боюнча дайынсыз болууда. Ал акыркы жолу 14-январга караган түнү саат 02:00дө байланышка чыккан. Ошондой эле Аламүдүн капчыгайындагы «Жаннат» мейманканасыдагы камералардын бирине тоо жакты көздөй бара жатканы түшүп калганы аныкталган.