Бүгүн, 2025-жылдын 18-октябрында КР Министрлер Кабинетинин Төрагасынын орун басары – УКМК Төрагасы генерал-полковник Камчыбек Ташиев Чүй облусунун Кемин районунун Кайыңды айылынын тургуну, 42 жаштагы Мирбек Кадыралиевге жаңы курулган төрт бөлмөлүү үйдүн ачкычын тапшырды.
Эске салсак, М.Кадыралиев 2024-жылы оор жүк ташуучу унаа айдоочусу болуп иштеп жүргөн учурда кырсыктын айынан бир колун жоготкон. Натыйжада иштөө мүмкүнчүлүгүнөн ажырап, үй-бүлөсү менен батирде жашап келген. Эмгек стажы жетишсиз болгондуктан, мамлекеттик пенсия алуу укугуна да ээ болбой калган.
2025-жылдын 25-августунда үч баланын атасы Мирбек Кадыралиев фейсбук социалдык тармагы аркылуу Президент Садыр Жапаров менен УКМК Төрагасы Камчыбек Ташиевге жардам сурап кайрылган. Өлкө башчысы С.Жапаровдун жеке тапшырмасынын негизинде, генерал-полковник Ташиевдин көзөмөлү астында эки күн ичинде жаңы үйдүн курулушу башталган.
Бир ай ичинде бардык заманбап шарттары бар төрт бөлмөлүү үй толук бүткөрүлүп, бүгүн Кадыралиевдердин үй-бүлөсүнө тапшырылды.
Өз сөзүндө генерал-полковник К.Ташиев Мирбек Кадыралиевге бекем ден соолук каалап, жаңы ак өргөөсү менен куттуктады.
Жаңы үйдүн ээлери өлкө башчысы С.Жапаровго жана К.Ташиевге ыраазычылыгын билдиришти.
Үй тапшыруу аземинен кийин генерал-полковник Ташиев Кайыңды айылынын тургундары менен жолугушуп, алардын көйгөйлөрүн укту.
