УКМК Ош облусундагы шаар курулуштарындагы коррупцияны аныктоо, алдын алуу жана бөгөт коюу боюнча жүргүзүлүп жаткан иш-чаралардын алкагында КРнын курулуш стандарттарын одоно бузуу менен курулган бир катар курулуш долбоорлорун аныктады деп билдирет атайын кызматтан.
Маалыматка ылайык, долбоордук-сметалык документтерди даярдоодо долбоорлоочу уюмдар жана курулуш компаниялары курула турган объектилер боюнча, тагыраагы жашоочуларды унаа токтотуучу жайлар менен камсыз кылуу боюнча туура эмес маалыматтарды атайылап киргизип, анын негизинде Ош шаарынын архитектура кызматкерлери турак жай комплекстерин куруу долбоорлорун бекитишкен.
Атап айтканда, материалдык пайда алуу максатын көздөп, курулуш компаниялары коммерциялык имараттарды курушкан, деген менен алар жашоочуларга жетиштүү унаа токтотуучу жайларды камсыз кылууга милдеттүү болушкан.
Өз кезегинде, Ош шаарынын архитектура кызматкерлери, кызматтык мүнөздөмөлөрүнө ылайык, шаардык инфраструктуранын өнүгүүсүн жана шаар тургундарынын ыңгайлуу жашоо шарттарын камсыз кылууну талап кылышат, иш жүзүндө курулуш компанияларынын өкүлдөрү менен алдын ала келишим түзүшкөн.
Натыйжада, Ош шаарынын аймагында шаар куруу чөйрөсүндөгү Кыргыз Республикасынын мыйзамдарын системалуу түрдө бузуу байкалууда, бул объекттерди куруу мөөнөттөрүн создуктурууга, үлүшчүлөрдүн нааразычылыгына, транспорттук абалдын олуттуу начарлашына, жол тармагында тыгындардын пайда болушуна жана шаардык инфраструктурага кошумча жүк келтирүүгө алып келет.
Чогултулган материалдардын негизинде КР УКМК тарабынан кылмыш иши козголуп, анын алкагында Ош шаарынын башкы архитекторунун биринчи орун басары Т.Ы.К. жана Ош шаарынын архитектура боюнча адиси Т.З.М. кармалып, КР УКМКнын убактылуу кармоочу жайына киргизилди.
Учурда кылмыш ишин иликтөөнүн алкагында Ош шаарындагы шаар курулушу чөйрөсүндөгү коррупциялык мүнөздөгү кызматтык кылмыштарды аныктоо боюнча иш-чаралар уланууда.