Аксы районунун жалпы дарыгердик практика борборунун акушери төрөт учурундагы аялдардан системалуу түрдө акча каражатын талап кылып алып жаткан жеринен кармалды. Бул тууралуу УКМКдан билдиришти.
УКМКнын Жалал-Абад облусу боюнча башкы башкармалыгына жаран кайрылып, Аксы райондук жалпы дарыгердик практика борборунун төрөт бөлүмүнүн акушер-гинекологу 1983-жылы туулган дарыгер опузалап акча талап кылып жаткандыгына байланыштуу мыйзам чегинде чара көрүлүшүн суранган.
Ыкчам тергөө иш-аракеттеринин негизинде 2-февраль күнү өзүнүн иш бөлмөсүндө талап кылган акчаны алып жаткан учурунда кармалган.