21-февралда Баткен чек ара отрядынын чек арачысы куралга этиятсыз мамиле кылуунун кесепетинен каза болду. Бул тууралуу Чек ара кызматынан билдиришти.
Алдын ала маалыматтар боюнча, чек ара заставасынын өздүк курамды алмаштыруу учурунда УКМКнын 1997-жылы туулган аскер кызматкери 2002-жылы туулган чек арачыны кокустан атып алган.
Медициналык кызмат көрсөтүлгөнүнө карабастан, аскер кызматкери алган жараатынан улам каза болгон. Бул факты боюнча тиешелүү органдарга маалымат берилген. Окуя болгон жерге Баткен гарнизонунун аскер прокуратурасынын өкүлдөрү жөнөп кетишти.