Абдылдаев Арстанбек Бейшеналиевичтин (Арстан Алай) жансыз денеси бүгүн, 5-январда саат 05:15 чамасында №31 түзөтүү мекемесинин ашканасында табылган. Жаза аткаруу кызматынын расмий маалыматы боюнча, маркумдун денеси асылып турган.
А.Абдылдаев 2023-жылдын 15-декабрында КР Кылмыш-жаза кодексинин 330-беренеси (диний кастыкты козутуу) менен УКМКнын Чүй облусу боюнча тергөө бөлүмү тарабынан камакка алынган.
16-декабрда Бишкек шаарынын Октябрь райондук соту баш коргоо чарасын карап, №1 тергөө абагына 2024-жылдын 15-январына чейин камакка алуу чечимин чыгарган.
ЖАКтын маалыматы боюнча, 28-декабрда врач-психиатрдын сунуштамасы менен А.Абдылдаев («Инсанияттын такталбаган психатикалык бузулушу, галлюцинация») №31 дарылоо мекемесине жеткирилген.
«29-декабрда №31 мекемеге келгенден кийин А.Абдылдаев мезгил-мезгили менен жүрөгү ооруп, башы ооруп, кулагы шуулдап, ашказаны ооруп (тамактангандан кийин), тез-тез чарчап калганына арызданып, дарыгерлерге кайрылган. Текшерүүнүн жыйынтыгы боюнча алдын ала: «Такталбаган психотикалык инсандык бузулуу . Коронардык жүрөк оорусу. Өтө жогорку тобокелдиктеги гипертониялык оору» деп аныкталган. Клиникалык диагнозду тактоо үчүн кардиологдун, гастроэнтерологдун кеңешин жана врач-психиатрлардын комиссиялык текшерүүсүн жүргүзүү зарылдыгы жөнүндө чечим кабыл алынган.
5-январда саат 04:52 чамасында айыпталуучу А.Абдылдаев ЖАКтын дарылоо мекемесинин ашкана бөлүмүнө кирип, болжол менен саат 05:15те асылган абалда табылган. Жансыз денени алгачкы кароодо жаракаттар табылган эмес. Өлүмдүн чыныгы себебин аныктоо максатында комиссиялык соттук-медициналык экспертиза дайындалды», — деп айтылат ЖАКтын расмий маалыматында.
