Депутат Балбак Түлөбаев Жогорку Кеңештин жыйынында Саламаттыкты сактоо министри Алымкадыр Бейшеналиевдин ишин кайрадан сынга алды.
Депутаттын айтымында, ага Ак-Суу районуна караштуу Каракол айылынын тургундарынан кайрылуу түшкөн.
“Айылда көп жылдардан бери төрөткана, лабораториясы бар оорукана иштеп келген. Бирок 5-6 жыл мурун талапка ылайык, төрөтканасын жаап салыптыр. Азыр аймактык реформанын негизинде бир топ айылдар кошулуп жатат. “Мурун деле көйгөй эле, эми алар кайда барат” деп жатышат. Алымкадыр Савирдинович акыркы убакта жетишпей жатабы же эмне, биз жакты жакшы карабай жатат”, — деди эл өкүлү.