Кыргызстанда Антимонополиялык жөнгө салуу кызматы кийлигишкенден кийин май майрамдары маалында Бишкек — Ош — Бишкек багыты боюнча авиабилеттердин баасы төмөндөдү.
Мекеменин маалыматына ылайык, 22-апрелде Жарандык авиация мамлекеттик агенттиги жана өлкөдөгү ири авиакомпаниялар — Avia Traffic Company, TezJet, Aero Nomad Airlines, Sky FRU жана Асман Эйрлайнс өкүлдөрүнүн катышуусунда жумушчу жыйын өткөн.
Талкуунун негизги темасы ички авиакаттамдардагы бааларды түзүү болду. Катышуучулар тарифтердин түзүмүн, авиаотундун баасынын таасирин, ошондой эле ортомчулар жана онлайн-платформалар аркылуу билет сатууда кошулган агенттик үстөктөрдү карап чыгышты.
Социалдык тармактардагы нааразычылыктар жана Жогорку Кеңештеги талкууларда баалар 10 миң сомго чейин өскөнү айтылганына карабастан, кызмат мындай тарифтер авиакомпанияларда катталган эмес экенин билдирди. Ошол эле учурда жыйындын жыйынтыгында Бишкек — Ош — Бишкек багыты боюнча билеттердин баасы 8 миң 820 сомдон 7 миң 600 сомго чейин төмөндөтүлдү.
Антимонополиялык орган авиакомпаниялардан баа түзүүнүн ачыктыгын камсыз кылууну жана өзгөчө майрам күндөрү негизсиз баа көтөрүүгө жол бербөөнү талап кылды. Ташуучуларга баа саясатын оңдоо боюнча көрсөтмөлөр берилди.
Мындан тышкары, жүргүнчүлөр менен авиакомпаниялардын кызыкчылыктарын тең салмактоо үчүн рынок катышуучуларынын ортосунда баа боюнча макулдашуу түзүү сунушталды.
Кызмат рынокту кеңири талдап чыгарын эскертти. Эгерде «Атаандаштык жөнүндө» жана «Керектөөчүлөрдүн укуктарын коргоо жөнүндө» мыйзамдардын бузулушу аныкталса, тиешелүү чаралар көрүлөт. Ички авиакаттамдардагы бааларга мониторинг улантылат.