Бишкекте «Кыргыз Элечек — Жибек жолунун жүрөгү» аттуу мода көргөзмө өттү

Бүгүн, 19-июнда маданий жана салттуу мурастарды улантуучу «Аталар изи» студиясынын негиздөөчүсү Асел Калканованын «Кыргыз Элечек — Жибек жолунун жүрөгү» аттуу мода көргөзмөсү өттү. Көргөзмө Венгриянын Кыргыз Республикасындагы элчилигинин колдоосу менен уюштурулду.

Көргөзмө учурунда этно-дизайнер Асель Калканова 7 түрдүү элечекти ороо ыкмасын көрсөттү. Катышуучулар көргөзмөнүн ар бир номерин бир дем менен көрүшүп, көкүрөк толуп, көөдөн керип, кыргыздын улуттук кийимдеринин кылым карытып келе жатканына сыймыктанып да, суктанып да, ал тургай көзгө жаш алгандай абалда болушту.

Иш-чаранын негизги максаты — байыркы жана этникалык элечектерди кайрадан жандантуу, улуттун уңгусун сактоо, келечекке мурас катары тапшырып берүү болуп саналат.