Чүй облусунда мектеп рэкетчилигине каршы күрөшүү иштери жүргүзүлүп, кылмышка шектүү жаран кармалды. Бул тууралуу Чүй ОИИБден билдиришти.
21-апрелде Кемин РИИБге А.Казакбаев атындагы орто мектептин 9-классынын окуучусу ошол эле мектептин 8-классынын окуучуларынан системалуу түрдө уруп-сабап, опузалап акча талап кылгандыгы боюнча маалымат түшкөн.
Аталган факты Кемин РИИБге катталып, 208-беренеде көрсөтүлгөн (опузалап талап кылуу) кылмыштын белгилери менен кылмыш иши козголгон.
Кылмыш иши боюнча тергөө амалдарын жүргүзүү учурунда 2008-жылы туулган окуучунун өзүнөн кичүү балдардан опузалап акча талап кылган фактысы тастыкталып, ага байланыштуу кармалып, райондук милиция бөлүмүнө жеткирилген жана Кемин райондук соту тарабынан ага карата баш коргоо чарасы тандалат. Учурда кылмыш иши боюнча тергөө амалдары жүргүзүлүүдө.
