Аламүдүн районунун аймагынан уюшкан кылмыштуу топтун мүчөлөрүнө таандык курал-жарактарды сактоочу жай табылды. Бул тууралуу УКМКдан билдиришти.
Маркум криминалдык авторитет Камчы Көлбаевдин уюшкан кылмыштуу тобунун мүчөлөрү тарабынан жасалган курал-жарактардын жана жардыргыч заттардын арсеналы менен катылган жашыруун жай табылган. Такталган маалымат боюнча, Чүй облусунун Аламүдүн районундагы Арашан айылында жайгашкан мүрзөнүн аймагындагы мүрзө таштарынын биринен эки боз полипропилен баштык табылган.
Табылган баштыкты текшерүү учурунда ар кандай ок атуучу куралдар, ар кандай калибрдеги тапанчалар, Калашников автоматы, кесилген жылмакай куралдар, ок-дарылары менен жана жардыргыч заттар табылган. Сотко чейинки өндүрүштүн алкагында жогоруда аталган курал-жарактар алынып, тиешелүү экспертизага жөнөтүлөт.
