Чолпон-Ата шаарынын экс-мэри кызматтык абалынан кыянаттык менен пайдаланууга шектелүүдө. Бул тууралуу УКМКдан билдиришти.
УКМК тарабынан уюшкан кылмыштуу топтун лидери маркум Камчы Көлбаевге Чолпон-Ата шаарындагы 10 миллион сомдон ашык жер тилкесин берүүгө тиешеси бар, Чолпон-Ата шаарынын экс-мэри тарабынан кызматтык абалынан кыянаттык менен пайдалануу фактысы аныкталды. Аталган жарандын үйүн тинтүү учурунда мыйзамсыз сакталган ок атуучу курал ок-дарылары да табылган.
Соттун чечими менен Чолпон-Ата шаарынын экс-мэри 1 айга камакка алынды. Ушундай эле кылмыш ишинин алкагында Ысык-Көл району боюнча «Кадастр» мамлекеттик ишканасынын филиалынын адиси кармалып, Каракол ШИИБнин убактылуу кармоочу жайына киргизилген.
