Бүгүн, 2025-жылдын 23-октябрында КР Министрлер Кабинетинин Төрагасынын орун басары- УКМК төрагасы генерал-полковник К.Ташиев Нарын облусуна болгон жумушчу сапарынын алкагында Нарын шаарындагы Алма-Бак сейил багынын ичине курулган «Сүйүнбек Бекманбетов» атындагы адистештирилген балдар өспүрүмдөр олимпиадалык резерв мектебинин алдындагы «Мундуз Ата» эркин күрөш залынын ачылуу аземине катышты.
Аталган спорт комплекс эки кабаттуу болуп, биринчи кабатында күрөшүү залы, чечинүүчү-жуунучу жай, медициналык бөлмө жана машыгуучу зал жайгашкан. Ал эми экинчи кабатында машыктыруучулар үчүн бөлмөлөр бар.
Буга чейин аталган шаарда мындай заман талабына жооп берген машыгуу залы болгон эмес. Учурда 200дөн ашуун улан, кыздар машыгууда. Мындан улам, жергиликтүүлөр түзүлгөн шарттар үчүн өлкө жетекчилигине ыраазычылыктарын билдиришти.
Белгилей кетсек, имараттын курулушуна 2024-жылдын 4-ноябрында УКМК Төрагасы К.Ташиев капсула салган.
