2025-жылдын 14-февралында Кыргыз Республикасынын Куралдуу Күчтөрүнүн Улуттук гвардиясынын аскер бөлүгүндө Чүй облусунун Аламүдүн районундагы мектеп окуучулары үчүн ачык эшиктер күнү өткөрүлдү.
Иш-чарага аскер бөлүктүн командири, гвардиянын полковниги Н.Түлөбердиев, Республикалык жоокерлердин энелери комитетинин төрайымы У.Байгубатова, аскер кызматкерлери, 300дөн ашуун окуучу жана чакырылган коноктор катышты.
Программа алкагында окуучулар үчүн аскердик бөлүктө экскурсия уюштурулуп, жоокерлердин ашканасы жана казармасы көрсөтүлдү. Ошондой эле аскер кызматкерлери саптык даярдык көнүгүүлөрүн жана кол уруш ыкмаларын тартуулап, аскердик техника менен курал-жарактын көргөзмөсүн өткөрүштү. Иш-чара спорттук оюндар менен жыйынтыкталып, жеңүүчүлөргө грамота жана кубок тапшырылды.