2025-жылдын 7-декабрында КР Министрлер кабинетинин Төрагасынын орун басары-УКМК Төрагасы генерал-полковник К.Ташиевдин катышуусунда Улуттук коопсуздук органдарынын кызматкерлеринин кесиптик майрамына арналган спорттук оюн түрлөрү боюнча өткөрүлгөн мелдештин салтанаттуу жабылыш аземи болуп өттү.
Мелдешке КР УКМКнын штаб-квартирасынын, аймактык бөлүмдөрдүн, УКМКнын тогузунчу кызматынын кызматкерлери, ошондой эле «А» атайын багыттагы бөлүмүнүн кызматкерлери катышты.
Эркектер спорттун төмөнкү түрлөрү боюнча күч сынашты: мини-футбол, стол тенниси, ок атуу жана шахмат. Аялдар үчүн спорттун бир нече түрү боюнча мелдештер уюштурулду: жеңил атлетикалык командалык эстафета (1000 м), волейбол, ок атуу, дартс жана 3х3 форматында баскетбол.
Иш-чаранын катышуучуларына кайрылган сөзүндө генерал-полковник К.Ташиев системалуу дене тарбия машыгууларынын маанилүүлүгүн айтып: «Спорттук машыгуулар туруктуулукту, жоопкерчиликти, ишенимди жана ар бир улуттук коопсуздук кызматкери үчүн зарыл болгон сапаттарды калыптандырат. Биз Улуттук коопсуздук мамлекеттик комитетинин тутумунда спортту өнүктүрүүнү колдоону улантабыз» — деп баса белгиледи.
Мелдештин жеңүүчүлөрүнө кубоктор, грамоталар жана акчалай сыйлыктар тапшырылды.
