Москванын Басман соту «Крокус сити холлдогу» терактка шектелген Мухаммадсобир Файзов менен Шамсидин Фаридуниди 22-майга чейин камакка алды. Бул тууралуу Би-Би-Си жазды.
Буга чейин Басман соту дагы эки шектүү Далержон Мирзоев менен Муродали Рачабалисоданы камакка алууга уруксат берген. Соттон билдиришкендей, алар күнөөсүн мойнуна алышкан. Соттук отурум жабык эшик артында өткөн.
«Интерфакс» агенттиги билдиргендей, айыпталуучуда ур-токмоктун белгилери байкалган. Файзов коляска менен сотко жеткирилген. Төртөө тең Тажик жарандары, алар Орусиянын Кылмыш-жаза кодексинин 205-беренеси теракт жасаган деп айыпталып жатат. Бул беренеде өмүр бою эркинен ажыратуу жазасы каралган.