Бүгүн Б.Н. Ельцин атындагы Кыргыз-Орус Славян университетинде «Кытай заманбаптык жолунда» аттуу эл аралык студенттик илимий конференция болуп өттү. Иш-чараны КРСУнун Дүйнөлүк цивилизациялар жана тилдер институту уюштурду.
Конференция илимий коомчулуктун чоң кызыгуусун жаратып, уюштуруу комитетине жалпысынан 66 билдирме түшкөн. Анын ичинен 38и Кыргыз Республикасынан, 21и Россия Федерациясынан, 7си Кытай Эл Республикасынан жана 1и Малайзиядан. Катышуучулардын көптүгү — иш-чаранын эл аралык деңгээлин жана заманбап Кытай тууралуу илимий диалогдун актуалдуулугун айгинеледи.
Конференциянын алкагында КЭРдин өнүгүүсүнүн актуалдуу маселелери, анын стратегиялык артыкчылыктары жана глобалдык саясий-экономикалык процесстердеги ролу, ошондой эле кытай коомундагы социалдык жана маданий трансформациялар талкууланды.
Программа Кытайдын XXI кылымдагы ички жана тышкы саясатына, экономикалык модернизацияга жана глобалдык демилгелерге, ошондой эле тил, адабият жана маданияттар аралык байланышка арналган тематикалык багыттарды камтыды. Мындай комплекстүү мамиле катышуучуларга Кытайдын өнүгүүсүн ар тараптуу илимий өңүттө кароого мүмкүндүк берди.
Конференциянын иш тилдери катары кыргыз, орус жана кытай тилдери тандалды. Баяндамалар университеттин аянтчасында түз форматта, ошондой эле Microsoft Teams платформасы аркылуу аралыктан катышуу мүмкүнчүлүгү менен коштолду.
Өткөрүлгөн конференция академиялык жашоодогу маанилүү окуя болуп, илимий кызматташтыкты чыңдоого жана аймактагы заманбап Кытай тууралуу эксперттик диалогдун өнүгүшүнө салым кошту.
Конференциянын жыйынтыгы менен бардык катышуучуларга сертификаттар тапшырылды.