Кыргызстан менен Өзбекстан мамлекеттик чек араны делимитациялоо процессин аяктады. Бул тууралуу Кыргызстандын президенти Садыр Жапаров Өзбекстандын президенти Шавкат Мирзиёевдин Бишкекке мамлекеттик иш сапарынын алкагында сүйлөшүүлөрдүн жыйынтыгы боюнча ЖМКлар үчүн билдирүүсүндө белгиледи.
“Бүгүн биз үчүн тарыхый күн. Кыргызстан менен Өзбекстан мамлекеттик чек араны делимитациялоо процессин аяктап, кыргыз-өзбек мамлекеттик чек арасы тууралуу келишимдин грамотасын ратификациялоо менен алмашып, чек ара маселесине чекит койду.
Чек ара маселесинин биротоло чечилиши боордоштук мамилелерди мындан ары өнүктүрүүдө, чек ара байланыштарын чыңдоодо негизги ролду ойнойт, ошондой эле Борбордук Азия аймагында туруктуулукту жана коопсуздукту чыңдоого салым кошот деп ишенем”, — деди ал.