Сахара чөлүндөгү тонналаган кумдун чаңы шамал менен Европага жеткен. Германиянын, Франциянын жана Швейцариянын айрым аймактарында асманды туман каптады. Бул тууралуу Deutsche Welle жарыялады.
Жыл сайын Сахара чөлүнөн аба аркылуу 60 миллиондон 200 миллион тоннага чейин минералдык чаң ташылат. Чоңураак бөлүкчөлөр тез жерге түшсө, эң кичинелери кээде миңдеген чакырымга учуп кетет. Германиянын метеорологиялык кызматынын кызматкери Кристиан Герольд «Сахаранын чаңы бул жерде, аны абадагы саргыч булуттан көрүүгө болот» деди.
Швейцариялык SRF телекомпаниясынын метеорологу Роман Брогли 180 миң тонна чаң катталганын, бул акыркы жылдарга караганда эки эсе көп экенин айтты. Ал арада Франциянын жергиликтүү бийлиги айрым аймактарда абанын булгануу чегинен ашып кеткенин жарыялашты.