Бүгүн, 27-декабрь күнү президенттин Ош облусундагы ыйгарым укуктуу өкүлү Зиядин Жамалдинов Тажикстандын кол салуусунан каза болгон Ош облусунун тургундары, жоокерлердин жакындары менен жолугушту.
Облус башчысы өзүнүн резервдик фондунан 5 жоокердин үй бүлөсүнө 50 миң сомдон, Баткенден эвакуация болуп Ош облусунда жашап жаткан 1 үй бүлөгө 20 миң сом каражат бөлүп берди.
«2022-жылдын сентябрь айында Баткенде орун алган агрессиялык кол салууда мекенди коргоодо жана душмандарга өлкөбүздүн жерин тебелетпейм деп Ош облусунун тургундары, баатыр жоокерлерибиз курман болду. Алардын эрдиги эч качан унутулбайт жана алардын жакындарына мындан ары да колдоо көрсөтүп турабыз»,- деди Зиядин Жамалдинов.