Токмок шаарында курал-жарак жана ок-дарылар сакталган жашыруун жай табылып, ал маркум криминалдык төбөл К.Көлбаевдин уюшкан кылмыштуу тобунун мүчөлөрүнө тиешелүү болушу мүмкүн. Бул тууралуу КР УКМКнын басма сөз кызматы маалымдайт.
Мекеменин маалыматына караганда, аталган жай уюшкан кылмыштуулукка каршы жүргүзүлгөн ыкчам-иликтөө иш-чараларынын алкагында аныкталган.
Атайын кызматтын маалыматына ылайык, жеринен 2 кесилген мылтык, 2 мина, 1 өзүн-өзү жардыруучу түзүлүш, 1 граната, тротил, 1 бет кап, 2 бычак, 3 жандыргыч жана ар кандай калибрдеги патрондор табылып, алынган.
УКМКда белгилешкендей, бул арсенал мыйзамсыз иш-аракеттерде, анын ичинде өзгөчө оор кылмыштарды жасоо жана коомдук-саясий кырдаалды туруксуздаштыруу үчүн даярдалган болушу мүмкүн.
Учурда алынган курал-жарактар боюнча соттук-баллистикалык экспертиза дайындалып, алардын мурда жасалган кылмыштарда колдонулган-колдонулбагандыгын аныктоо боюнча иш-чаралар жүргүзүлүүдө.