Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттикте антикоррупциялык саясатты ишке ашырууда маанилүү кадам болгон кеңешме өткөрүлдү. Бул иш-чара 2025-жылдын 21-январында УКМКнын Төрагасы – Министрлер Кабинетинин Төрагасынын орун басары, генерал-полковник Камчыбек Ташиевдин тапшырмасынын негизинде уюштурулган.
Кеңешмеде коррупциялык мүнөздөгү кылмыштар үчүн жаза чараларын күчөтүү жана антикоррупциялык мыйзамдарды өзгөртүүлөр боюнча түшүндүрмө берүү негизги темалар болду. УКМКнын маалыматына ылайык, укук коргоо органдарынын аракеттерине карабастан, айрым мамлекеттик органдарда туруктуу коррупциялык схемалар дале жоюла элек.
Айрыкча, агенттиктин ишмердүүлүгүндө 2020-жылдан 2024-жылга чейинки аралыкта бир топ мыйзам бузуулар катталган: жети кылмыш иши козголуп, беш кызматкер кармалды, төртөө коррупцияга аралашкандыгы үчүн иштен алынса, бирөө уюшкан кылмыштуу топ менен байланышта болгону үчүн кызматтан кеткен.
Кеңешмеде мыйзамдардагы негизги өзгөртүүлөр талкууланды. Эми коррупциялык кылмыштар үчүн төмөнкү чаралар колдонулат:
- Коррупцияга аралашкан адамдарга мамлекеттик жана муниципалдык кызматтарды ээлөөгө өмүр бою тыюу салынат.
- Штраф түрүндөгү жазалар алынып салынды.
- Күнөөнү моюнга алуу жана зыяндын ордун толтуруу шарты менен да айыпталуучуга эркиндигинен ажыратуу жазасы берилет.
- Коррупция үчүн соттолгондорго, соттуулугу жоюлганына же алынып салынганына карабастан, мамлекеттик кызматта иштөөгө тыюу салынат.
Агенттиктин кызматкерлерине коррупциялык аракеттерди же схемаларды уюштурууга жол бербөө тууралуу катуу эскертүү берилди. Өлкө жетекчилиги 2025-2026-жылдар аралыгында коррупцияны толугу менен жоюу милдетин койгон.
УКМК мамлекеттик кызыкчылыктарды коргоо боюнча ишин улантууда. Жаңы чаралар бийликтин коррупцияга каршы күрөшүүдө олуттуу ниети бар экендигин айгинелейт.
