УКМК КР Саламаттык сактоо министрлигине караштуу Улуттук онкология жана гематология борборунда системалуу түрдө акча чогултуу фактысы боюнча, жарандардын УКМК жетекчилигинин дарегине бир нече жолу кайрылгандыгына байланыштуу, сот тарабынан санкцияланган тергөө иш-чаралары уюштурулуп, анда аталган борбордун дарыгери тарабынан системалуу түрдө акча чогултуу жана алуу фактылары аныкталган.
Тактап айтканда, 2025-жылдын 28-январында козголгон кылмыш ишинин алкагында, Кыргыз Республикасынын Саламаттык сактоо министрлигине караштуу Улуттук онкология жана гемотология борборунун дарыгери – 1988-жылы туулган «С.М.П.» кармалган, ал системалуу түрдө Онкологиялык оорулууларга жасалган операциялар жана акысыз медициналык кызмат көрсөтүүлөр үчүн, ошондой эле акы төлөнүүчү кызмат көрсөтүүлөр үчүн алынган төлөмдөрдү реестерге каттабастан, алар боюнча квитанцияларды бербестен 2000 сомдон 20000 сомго чейин акча каражаттарын бейтаптардан алып жүргөн. Буга байланыштуу санкцияланган видео байкоонун жүрүшүндө аталган дарыгер тарабынан пара алуунун көптөгөн фактылары (эпизоддору) тастыкталган. Дарыгердин кабинетин тинтүүнүн натыйжасында бейтаптардан алынган 119 000 сом жана 100 АКШ доллары табылып, алынган.
Козголгон кылмыш ишинин алкагында дарыгер «С. М. П.» КР КЖКнын 96-беренесине ылайык КР УКМКнын тергөө абагына киргизилди. КР Саламаттык сактоо министрлигине караштуу УОГБнун кызматкерлеринин арасынан кылмышка тиешеси бар башка кызматкерлерди аныктоо боюнча тергөө-ыкчам иш-чаралары улантылууда.
КР УКМК коррупцияга каршы күрөшүү чөйрөсүндөгү мыйзамдардын катаалдашканына байланыштуу, өлкөбүздүн мамлекеттик жана муниципалдык органдарындагы коррупциялык кылмыштарды аныктоо жана бөгөт койуу боюнча активдүү жана максаттуу иштер жүргүзүлүп жатканын эскертет.
