Бул тууралуу УКМКнын маалымат борборунан билдиришти.
Маалыматта айтылгандай, уюшкан кылмыштуу топтордун мыйзамсыз иш-аракеттерине бөгөт коюу боюнча жүргүзүлүп жаткан иш-чаралардын жүрүшүндө Ысык – Көл облусунун «Каракол – Кызыл-Суу» багыты боюнча жүргүнчүлөрдү ташуу (такси) боюнча ишкерлик кылууга уруксат берүү шылтоосу менен 656 миң сом алып жаткан жеринен Кыргыз Республикасынын жараны Д.Н.М. кармалды.
Аталган Д.Н.М. өзүнүн иш-аракетин мыйзамдаштыруу максатында «Н.Т.» ЖЧКсы ишкердик субъекти аркылуу транспорттук жана ортомчулук кызматтарды көрсөтүү боюнча жасалма келишимдерди түзгөндүгү аныкталган.
Жүргүзүлгөн иликтөө иштеринин натыйжасында КР жараны Д.Н.М. кармалып, Каракол шаарындагы №23 тергөө абагына киргизилди.
Ошону менен бирге КР УКМК жарандарды сак болууга жана кайсы бир маселени мыйзамсыз чечүү үчүн акча талап кылган абийирсиз адамдардын, анын ичинде жарым-жартылай кылмыштуу элементтердин колуна түшүп калбоого чакырат. Алдамчылык же башка мыйзамсыз аракеттер болгон учурда укук коргоо органдарына кайрылууну сунуштайбыз.
