Ардагерлерге жана чыр-чатактардын катышуучуларына төлөнүүчү компенсациялар көбөйтүлдү. Тиешелүү жарлыкка президент Садыр Жапаров кол койду.
Жарлыктын күчү 2025-жылдын 1-январынан тартып күчүнө киргени белгиленген.
Жарандардын айрым категорияларына жеңилдиктердин ордуна ай сайын акчалай компенсациялар төмөнкүдөй төлөнөт:
Улуу Ата Мекендик согуштун катышуучулары — 10 000 сом (мурда 7000);
Улуу Ата Мекендик согуштун майыптары — 10 000 сом (мурда 7000);
концлагерлердин мурдагы жашы жете элек туткундары — 10 000 сом (мурда 7000);
За оборону Ленинграда медалы жана/же Жителю блокадного Ленинграда белгиси менен сыйланган адамдар — 10 000 сом (мурда 7000);
башка мамлекеттердин аймагындагы согуштук аракеттерде жаракат алган майып аскер кызматчылары — 10 000 сом (мурда 7000);
аскердик кызмат өтөп жатып жарадар болгон, контузия алган, майып болгон аскер кызматчылары — 10 000 сом (мурда 7000);
башка мамлекеттердин аймагындагы согуштук аракеттердин катышуучулары — 8 000 сом (6000);
Чернобыль АЭСиндеги авариянын кесепетинен жабыр тарткан майыптар жана нурлануу оорусуна чалдыккандар — 10 000 сом (3000);
1986-1987-жылдары Чернобыль АЭСиндеги авариянын кесепеттерин жоюуга катышкандар — 3 500 сом (2500);
Улуу Ата Мекендик согуш жылдарында ооруктагы кайратман эмгеги үчүн СССР ордендери жана медалдары менен сыйланган, майыптыгы бар адамдар — 2 000 сом;
саясий жана/же диний ынанымы үчүн, улуттук же башка белгилери боюнча репрессияланган жана реабилитацияланган жарандар — 1 500 сом;
1988-1989-жылдары Чернобыль АЭСиндеги авариянын кесепеттерин жоюуга катышкан адамдар — 2 000 сом (1000);
Чернобыль авариясынын натыйжасында каза болгон майыптардын жана нурлануу оорусунан көз жумгандардын үй-бүлөсү — 1 500 сом (1000);
Чернобыль авариясынын кесепеттерин жоюуга катышкан адамдардын 18 жашка чейинки балдары — 1 500 сом (1000);
Улуу Ата Мекендик согуш учурунда ооруктагы кайратман эмгеги үчүн сыйланган, бирок майыптуулугу жок адамдар — 1 000 сом;
Улуу Ата Мекендик согушта курман болгон аскер кызматчыларынын үй-бүлөсү — 1 500 сом (1000);
аскер кызматын өтөп жатып курман болгон аскер кызматчыларынын үй-бүлөсү — 1 500 сом (1000);
ички иштер кызматын өтөө учурунда же кызматтык милдетин аткарып жатып курман болгон ички иштер кызматкерлеринин үй-бүлөсү — 1 000 сом;
Улуу Ата Мекендик согуштун курман болгон катышуучуларынын кайра турмушка чыкпаган жесирлери — 1 500 сом (1000);
Кыргыз Республикасынын ардактуу донору төш белгиси менен сыйланган адамдар — 1 000 сом;
көрүүсү же угуусу боюнча майыптар — 1 000 сом;
1993-1999-жылдары тажик–афган участогунда КМШ чек араларын кайтаруу боюнча милдеттерди аткарган аскер кызматчылары — 1 000 сом.
Ошондой эле бул төлөмдөрдү жөнгө салган президенттин 2009-жылдын 13-ноябрындагы №511 «Энергия булактарына тариф саясатынын өзгөрүшүнө байланыштуу жарандардын айрым категорияларына акчалай компенсацияларды төлөп берүү жөнүндө» жарлыгы күчүн жоготту.