Владимир Зеленский Рождество маалында Россия менен элдешүү жана туткундарды алмашуу боюнча сунушту четке какты. Бул тууралуу Венгриянын премьер-министри Виктор Орбан социалдык тармактагы баракчасында жазганын РИА Новости маалымдады. Анын айтымында, Венгрия ЕБдеги төрагалыгынын акыркы мезгилинде тынчтык орнотуу үчүн жаңы аракеттерди көрүп, Рождестводо ок атышууну токтотуп, туткундарды алмашууну сунуштаган, бирок Зеленский бул сунушту кабыл алган эмес.
Өлкөнүн ТИМ жетекчиси Петер Сийярто Орбандын бул демилгеси тууралуу Россиянын президенти Владимир Путин менен телефондон сүйлөшкөнүн кабарлады. Ал сүйлөшүүдөн кийин Украинанын тышкы иштер министри Андрей Сибига жана президенттин кеңсе башчысы Андрей Ермак менен байланышып, сүйлөшүү тууралуу маалымат бергенин белгиледи. Анын айтымында, бул аракеттер эки тараптуу коммуникациялык каналдардын ачык экенин жана келечекте тынчтык сүйлөшүүлөрү болоруна үмүт бар экенин көрсөтүп турат.
Орбан акыркы жарым жыл ичинде Украинадагы согушту токтотуу боюнча бир катар кадамдарды жасап, дипломатиялык жолдорду издөөгө кызыгуусун билдирген. Ал жакында Владимир Путин менен сүйлөшүп, кризисти чечүүнүн дипломатиялык ыкмаларын издөөгө кызыкдар экенин айткан. Ошондой эле АКШнын жаңы шайланган президенти Дональд Трамп жана анын улуттук коопсуздук боюнча кеңешчиси Майк Уотц менен жолугушуп, украин кризисин жөнгө салуу боюнча маселелерди талкуулаган.
Июль айында Орбан Владимир Путин, Си Цзиньпин, Режеп Тайип Эрдоган, Дональд Трамп жана Владимир Зеленский менен жолугуп, украин кризисин чечүү үчүн ишке ашуучу максаттар менен мөөнөттөрдү камтыган пландарды ЕБ лидерлерине сунуштаган.