Токмокто эркек киши 61 жаштагы ишкердин 1,7 тонна балыгын алдап алып кетип, из жашырган. Бул туурасында Чүй облустук милициясынан кабарлашты.
17-мартта тартип сакчыларына 61 жаштагы Л. Х. аттуу жаран кайрылып, Н. Б. жана Н. А. аттуу адамдарга чара көрүүнү суранган.
«2023-жылдын январь айында экспорттойбуз деп 1,7 тонна балыкты алып, ошол тейден из жашырышкан. Мындан улам ишкер 621 миң сомдук чыгымга учураган», — деп айтылган маалыматта.
Аталган факт боюнча Кылмыш-жаза кодексинин 209-беренеси («Алдамчылык») менен иш козголгон.
«1988-жылы туулган Н. Б. аттуу жаран жашырынып жүргөн жеринен убактылуу камак жайына алып келинди. Тергөө учурунда анын Токмок шаарында дагы бир канча алдамчылык кылып, ага иш козголгону маалым болду», — деп билдиришти.
Милициядан тергөө уланып жатканын кошумчалашты.