Режиссер Мирлан Абдыкалыковдун «Кыз ала качуу» тасмасы Бусан эл аралык кинофестивалынын Jiseok сынактык программасында жеңүүчү аталып, башкы сыйлыкты алды. Аталган кинофестивалы 28-ирет Түштүк Кореяда 4-13-октябрь күндөр аралыгында өттү.
1996-жылы негизделген Бусан эл аралык кинофестивалы бүгүнкү күндө эң ири азиялык кинофестиваль болуп саналат. Быйылкы жылы дүйнөнүн 70 өлкөсүнөн 269 тасма тандалып алынган. Ал эми кыргыз тасмасы ат салышкан программада баш-аягы 20 фильм сыйлыкка талапкер болду.
Буга чейин «Кыз ала качуу» тасмасынын режиссёру Мирлан Абдыкалыков менен тасманын продюсери Алтынай Койчуманова Түштүк Кореядагы кинофестивалда кызыл килемден өтүшкөн.