Соттун чечими менен “Реформациялык кыймылдын жетинчи күнүнүн ишенимдүү жана эркин адвентисттеринин бүткүл дүйнөлүк Бүткүл союздук чиркөөсү” уюмунун ишмердүүлүгүнө тыюу салынды.
Бул тууралуу УКМКнын маалымат борборунан билдиришти.
Маалыматта айтылгандай, КР УКМК буга чейин диний уюмдардын мыйзамсыз иш-аракеттерине каршы күрөшүү боюнча жүргүзүлүп жаткан иштердин алкагында, ошондой эле Кыргыз Республикасынын жарандарынын укуктарын жана мыйзамдуу кызыкчылыктарын коргоо максатында Бишкек шаарында «реформациялык кыймылдын жетинчи күнүнүн ишенимдүү жана эркин адвентисттеринин Бүткүл дүйнөлүк Бүткүл союздук чиркөөсү» жашыруун диний уюмунун жетекчилеринин пайдасына конфессиялар аралык кастыкты жана көз боемочулук көрүнүштөрдү пайда кылган мыйзамга каршы иш-аракеттерин аныктап, бөгөт койгон.
Уюм Кыргыз Республикасынын аймагында каттоосу жана тийиштүү уруксаты жок иштеп, жарандарды идеологиялык жактан жалдоо жана башка конфессияларга каршы кастыкты козутуу менен алектенгени аныкталган.
Аталган диний уюм расмий катталган жетинчи күндүн адвентисттеринен бөлүнүп чыккан. Мындан тышкары, лидерлер жашоонун дээрлик бардык аспектилерине жалпы тыюу салуу жана чектөө идеясын жигердүү жайылтышып, жолдоочуларын кирешенин каалаган түрүнүн 20% өлчөмүндө ай сайын финансылык төгүмдөрдү төлөөгө милдеттендиришкен.
Дин таануу экспертизасы башка конфессияларды каралоо, ошондой эле аудиториянын аң-сезимин оозеки манипуляциялоо, артыкчылыктарын пропагандалоо, уюмдун жактоочуларынын эксклюзивдүүлүгүн жүргүзүү аркылуу диндер аралык кастыкты козутуунун элементтери бар экендигин тастыктады.
2025-жылдын 19-мартында Аламүдүн райондук сотунун чечими менен аталган диний уюмдун ишмердүүлүгү, алардын басма жана электрондук материалдарынын версиялары экстремисттик деп табылып, ишмердүүлүгүнө жана Кыргыз Республикасынын аймагында атрибуттарды же символикаларды колдонууга тыюу салынды.
Белгилей кетсек, КР УКМК тарабынан экстремисттик идеологиянын жайылышын алдын алуу боюнча ишин улантып, диний-экстремисттик идеологияны жайылтууга катышкандыгы жана тараткандыгы үчүн кылмыш жоопкерчилигин эскертет.