Каракол улуттук паркынын инфраструктурасын жаңыртуу жана өнүктүрүү боюнча ири өзгөртүүлөр пландалып жатат. Президенттин иш башкармалыгы маалымдагандай, паркта заманбап A-frame үлгүсүндөгү үйлөр курулуп, толугу менен санариптештирүү иштери жүргүзүлмөкчү.
Каныбек Туманбаевдин жетекчилигинде өткөн жыйында Каракол улуттук табият паркын Ала-Арча улуттук паркынын үлгүсүндө өнүктүрүү талкууланган. Парк аймагындагы ижарага берилген жерлерди ирээтке келтирүү сунушталып, аймакта санариптештирүүнүн төмөнкү чаралары белгиленди:
- Электрондук шлагбаумдар жана акылдуу кулпуларды орнотуу;
- Төлөмдөрдү накталай эмес жүргүзүү механизмин киргизүү.
Бул чаралардын негизги максаты — коррупцияны алдын алуу жана паркты заманбап туристтик жайга айландыруу. Ошондой эле, жыйында Караколду кышкы туризмдин борбору кылуу боюнча пландар талкууланды. Учурда аэропорттун курулушу аяктап, 3, 4 жана 5 жылдыздуу мейманканалардын курулушу жүрүп жатканы белгиленди.
Бул иш-чаралардын натыйжасында Каракол улуттук паркынын туристтик потенциалы кыйла жогорулап, жергиликтүү жана эл аралык туристтер үчүн ыңгайлуу шарттар түзүлөрү күтүлүүдө.