Бул тууралуу УКМКнын маалымат борборунан билдиришти.
Маалыматта айтылгандай, 2025-жылдын 22-январында И.Ахунбаев атындагы Кыргыз мамлекеттик медициналык академиясында коррупцияга каршы түшүндүрүү жана алдын алуу иштери жүргүзүлдү.
Иш-чара КР Министрлер Кабинетинин Төрагасынын орун басары– УКМК төрагасы генерал-полковник К.К.Ташиевдин тапшырмасынын алкагында болуп өттү.
Аталган жолугушууга жалпы 500гө жакын адам, окуу жайдын жетекчилиги, окуу бөлүмдөрүнүн (институттар, факультеттер, кафедралар ж.б.) жетекчилери, профессордук-окутуучулук курам жана студенттер катышты.
УКМКнын кызматкерлери үстүбүздөгү жылдын 21-январында күчүнө кирген коррупцияга каршы аракеттенүү чөйрөсүндөгү мыйзам актыларына киргизилген өзгөртүүлөрдү, тагыраагы коррупциялык кылмыштарды жасагандар үчүн күчөтүлгөн жоопкерчиликти түшүндүрүштү.
Ошондой эле, УКМК кызматкерлери тарабынан 2020-жылдан тартып 2024-жылга чейинки мезгилде республиканын саламаттык сактоо системасында аныкталган жана бөгөт коюлган коррупциялык схемалардын, фактылардын жыйынтыктары мисал келтирилди.
