КР УКМК: Жалал-Абад облусунун Казарман айылындагы мектептерге жана бала бакчаларга карата террористтик коркунучтар тууралуу билдирүүлөрдүн автору кармалды
КР УКМК тарабынан террордук актыларды жасоо жөнүндө жалган билдирүүлөрдү таратууга байланыштуу интернет-террорист аныкталды.
Аталган жаран «Фейсбук» социалдык тармагындагы «Казарман реклама» аттуу баракча аркылуу Жалал-Абад облусунун Тогуз-Торо районундагы Казарман айылындагы бала бакчаларда жана орто мектептерде террористтик чабуулдар даярдалып жаткандыгы тууралуу билдирүүлөрдү жарыялаган.
Жүргүзүлгөн ыкчам-издөө иш-чараларынын жыйынтыгында Тогуз-Торо районундагы орто мектептердин биринин 8-классынын окуучусу Б.К. аныкталды. Ал интернет-террористтик таасирге кабылып, психологиялык кысым жана мажбурлоо шарттарында террордук акт жасоону көздөгөн.
Учурда кармалган жаранга карата Кыргыз Республикасынын колдонуудагы мыйзамдарына ылайык чара көрүү максатында КР УКМК тарабынан тиешелүү тергөө иш-аракеттери жүргүзүлүүдө.
КР УКМК эскертет: Кыргыз Республикасынын мыйзамдарына ылайык оор жана өзгөчө оор кылмыштар үчүн жоопкерчилик 14 жаштан баштап каралат, ал эми террордук акт жасайм деп коркутуу үчүн 5 жылдан 10 жылга чейин эркинен ажыратуу жазасы каралган.