Кыргызстанда көп кабаттуу үйлөрдүн курулушу боюнча жаңы талаптар киргизилди. Бул тууралуу Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаев билдирди.
Анын маалыматына ылайык, 2024-жылдын сентябрь айынан тартып күчүнө кирген жаңы эрежелерге ылайык:
- 1 батирге 1 автоунаа токтотуучу жай принциби милдеттүү болуп калды. Бул талап аткарылбаса, курулушка уруксат берилбейт.
- Беш кабаттан жогору болгон үйлөрдүн жер төлөсүндө автоунаа токтотуучу жай сөзсүз каралышы керек.
Ошондой эле, курулуш компанияларына унаа-лифт сыяктуу автоунаа токтотуучу жайларды уюштурууда үнөмдүү жана натыйжалуу чечимдерди колдонууга мүмкүнчүлүк берилери кошумчаланды.
Бул талаптар жарандардын жашоо шарттарын жакшыртуу жана унаа токтотуу маселелерин чечүү максатында киргизилген.