28-сентябрда президент Садыр Жапаров Берлин шаарында Германиядагы кыргыз диаспорасынын өкүлдөрү менен жолугушту. Бул тууралуу президенттин басма сөз кызматы билдирди.
Президент жолугушууга келген мекендештерге ыраазычылык билдирип, иш сапарынын алкагында пландаштырылган иш-чараларга, өлкөдө жүргүзүлүп жаткан реформаларга кыскача токтолду.
Өлкө башчы Кыргызстандын элчилигинин аймагында орнотулган айкелдин маанисин белгилеп, «Манас» эпосу кыргыз элинин жалпы тарыхын, каада-салтын жана үрп-адаттарын камтыган тарыхый баа жеткис булак болуп саналарын билдирди.
«Биздин ата-бабаларыбыздын калтырган бул зор осуяты бүгүнкү күндө да өзүнүн маанисин жоготкон жок жана бизге дайыма жол көргөзүп келет. Бул элди биримдикке, ынтымакка чакыруу», — деди президент.
Садыр Жапаров мекендештерге кайрылып, алар Кыргызстан менен дайыма байланышта болуп, мекенине салым кошоруна ишенерин билдирди.
Диаспоранын өкүлдөрү суроолорун берип, өлкөдөгү оң реформаларды, социалдык-экономикалык тармактагы өзгөрүүлөрдү белгилешти.
