Жогорку Кеңештин бүгүнкү, 17-ноябрдагы жыйынында президент Садыр Жапаров Өзбекстан менен чек ара маселесине чекит коюлганын билдирди.
“Эми, кудай буйруса, Тажикстан менен чек ара тилкелерибизди тактайбыз. Тоскоолдуктар болбосо жаңы жылга чейин бүтүрүп, алып келебиз”, — дейт ал.
Жапаров Кыргызстан коңшу өлкөлөр менен ынтымакта, достукта жашап, октон бир дагы жоокер каза болбошу керектигин белгилеп өттү.
“Өлкөнүн аянты 199 миң чарчы чакырым болсо, чек араны тактагандан кийин, 210 миңден ашык чарчы чакырым болуп, картабыз чоңоет. Тажикстан менен чек араны чечишкенден кийин Кыргызстанды бүтүн, коопсуз деп айтсак болот. Азыр биз жарты Кыргызстанбыз, 30 жылдан бери кескилеп жатып, жарты кылып салышкан. Баарын кайтарып, бүтүн кылып жатабыз”, — деп айтат өлкө башчы.