Жапаров Бишкекте энергонатыйжалуу жана ресурс үнөмдөөчү технологияларды киргизүү боюнча регионалдык борбор түзүүнү сунуштады.
Президент Садыр Жапаров Борбор Азия мамлекет башчыларынын консультативдик жолугушуусунда суу маселесин көтөрдү.
Мамлекет башчы аномалдуу суук, өзгөчө кырдаалдар, узакка созулган кургакчылык жана суунун аздыгы сыяктуу климаттын өзгөрүшү регионго терс таасирин тийгизип жатканын белгиледи. Андыктан Борбор Азиянын ресурстарды сарамжалдуу пайдалануу үчүн суу жана суу-энергетикалык секторлорго капиталдык салымдарды тартуу боюнча кескин, конкреттүү жана натыйжалуу чараларды көрүүгө чакырды.
«Борбор Азияда суу пайдалануу маселелери боюнча регионалдык уюмдардын ишмердүүлүгү бардык өлкөлөрдүн – жогорку жана төмөнкү аймактардын кызыкчылыктарына жана муктаждыктарына жооп бериши керек экендигин баса белгилегим келет. Казакстан, Кыргызстан, Өзбекстан жана Тажикстан ортосундагы 1998-жылдагы Нарын-Сырдарыя дарыясынын суу жана энергетикалык ресурстарын пайдалануу жөнүндө макулдашуунун алкагында кызматташтыкты жандантып, өркүндөтүү боюнча ишти баштоону сунуштайм. Анда суу жана энергетикалык ресурстарды тең салмактуу алмашуу каралган. Биз суу-энергетикалык маселелердин бардык спектри боюнча конструктивдүү жана өз ара пайдалуу кызматташууга даярбыз», — деди Жапаров.
Ошондой эле ал Бишкек шаарында Борбор Азия регионунда энергонатыйжалуу жана ресурс үнөмдөөчү технологияларды киргизүү боюнча регионалдык борбор түзүүнү сунуштады. Бул региондо жалпысынан суу жана энергетикалык ресурстарды сарамжалдуу пайдаланууну камсыз кылууга мүмкүндүк берет.
Аны менен катар мамлекет башчы аксиоматикалык түшүнүк менен алганда «мөңгүлөрсүз суу болбойт, ал эми суусуз жашоо болбойт» деген талашсыз чындык экенин айтты.
«Бир өлкөдө суу-энергетикалык көйгөйлөрдүн чечилбегендиги Борбор Азиянын башка өлкөлөрүн суу менен камсыз кылуу маселесинде чагылышы мүмкүн экендигин белгилей кетүү керек. Буга байланыштуу биз кызыкдар өлкөлөргө региондун суу ресурстарынын дээрлик жарымын түзүүчү өлкө катары Кыргызстандын суу секторуна инвестицияларды жана заманбап технологияларды тартуу үчүн аракеттерди бириктирүүнү сунуштайбыз. Бул суу-энергетикалык ресурстарды натыйжалуу пайдаланууга гана эмес, ар кандай жаратылыш таасирлерине туруктуулукту жогорулатууга да мүмкүндүк берет», — деди президент.