Тиш тазалатууга барган бөбөк кетонал менен анальгинди колдонуудан өрчүп кеткен анафилактикалык шоктон улам көз жумган. Бул соттук-медициналык экспертизанын жыйынтыгы экенин Республикалык соттук-медициналык экспертиза борборунун жетекчисинин орун басары Эрнис Акунов билдирди.
Буга чейин 31 жаштагы анестезиологдун жактоочулары маалымат жыйын өткөрүп, экспертизанын жыйынтыгы үч жашар кыз кетонал менен анальгин дарыларын сайгандан кийин көз жумганын көрсөткөнүн айтышкан.
Алар анестезиолог бул дарыларды саюу боюнча өз алдынча көрсөтмө бербегенин, буга чейин жасап жүргөн ишин гана аткарганын кошумчалашкан. Акунов бул иш боюнча комиссиялык соттук-медициналык экспертиза дагы жүргүзүлөрүн белгилеп, бөбөктүн өлүмүнүн себеби, ким күнөөлүү экени ошондо так билинерин кошумчалаган.