Бүгүн, 23-октябрда, КР Министрлер Кабинетинин Төрагасынын орун басары – УКМК Төрагасы генерал-полковник К.К. Ташиев Нарын облусуна болгон жумушчу сапарынын алкагында Ак-Талаа районуна атайын техникаларды тапшырды. Бул кадам аймактагы чарбалык иштерди жана инфраструктураны өнүктүрүүгө багытталган.Бул тууралуу УКМКнын басма сөз кызматы билдирет.
Иш-чаранын алгачында КР Президентинин иш башкаруучусу К. Туманбаев УКМК Төрагасына техникалар менен тааныштырды жана алардын пайдаланылышы тууралуу маалымат берди. Генерал-полковник Ташиев техниканы жеке карап, район тургундарына кандай пайда алып келерин түшүндүрдү.
Белгилүү болгондой, Президенттин Турукташтыруу фондунан Ак-Талаа районуна 110 млн сом бөлүнгөн. Жалпысынан 13 техника алуу пландалган, анын ичинен 6 айыл чарба жана атайын техникалар тапшырылды.
УКМК Төрагасы аймактардагы социалдык муктаждыктарды канааттандыруу азыркы күндө башкы максат экенин белгилеп, «Казынадан керектүү каражаттар бөлүнүп, аймактарда оң өзгөрүүлөр байкалууда», – деди.
Иш-чаранын жүрүшүндө ал жергиликтүү тургундарга кайрылып, райондо курула турган жаңы төрөт үйү, ири футбол аянты жана ипотекалык үйлөр боюнча маалымат берди. Бул долбоорлор Ак-Талаа районунун жашоосун жакшыртууга чоң салым кошот.
