УКМК КР Министрлер Кабинетине караштуу Транспорт каражаттарын жана айдоочулук курамды каттоо боюнча мамлекеттик агенттиктин жетекчилиги менен биргеликте коррупциялык көрүнүштөрдү демонтаждоо боюнча жүргүзүлүп жаткан иштердин алкагында автотранспорт каражаттарын каттоо тартибин одоно бузуу фактыларын аныктады.
Тактап айтканда, Транспорт каражаттарын жана айдоочулук курамды каттоо боюнча мамлекеттик агенттиктин кызматкери документтер боюнча РФнын аймагынан Кыргыз Республикасына ташылып келинген делген жүк ташуучу транспорт каражаттарын акчалай сыйлык үчүн мыйзамсыз тариздегени аныкталган.
Бирок, текшерүү көрсөткөндөй, бул транспорт каражаттары Казакстанда бажыдан өткөрүлгөн, анда Бурабай протоколуна ылайык жүк ташуучу автомобилдерге алып келүү алымынын төмөндөтүлгөн ставкасы (10%) колдонулат. Мындай транспорт каражаттары шарттуу чыгарылган деп таанылат жана кайра декларациялоосуз, бажы төлөмдөрүн төлөбөстөн жана «ЕАЭБ товары»статусун тастыктамайынча башка мамлекеттин органдарында катталышы мүмкүн эмес.
Мындан тышкары, аталган кызматкер акчалай компенсация алуу үчүн транспорт каражаттарын каттоо эрежелерин бузуу менен мыйзамсыз түрдө жүк ташуучу фураларды жүргүнчүлөрдү ташуучу кичи автобустарга айландырган.
Аталган факты боюнча козголгон кылмыш ишинин алкагында КР Министрлер Кабинетине караштуу Транспорт каражаттарын жана айдоочулук курамды каттоо боюнча мамлекеттик агенттиктин Кара-Көл секторунун адиси кармалып, тергөө амалдары жүрүп жатат.
КР УКМК: КР Министрлер Кабинетине караштуу Транспорт каражаттарын жана айдоочулук курамды каттоо боюнча мамлекеттик агенттиктин Кара-көл секторунун адиси автотранспорт каражаттарын мыйзамсыз каттагандыгы үчүн кармалды
