Кыргыз Республикасынын Улуттук коопсуздук мамлекеттик комитети (УКМК) КР Кылмыш-жаза кодексинин 278 жана 330-беренелери боюнча «Массалык башаламандык» жана «Расалык, этностук, улуттук, диний же региондор аралык кастыкты козутуу» деген кылмыш иши боюнча жүргүзүлүп жаткан ыкчам-издөө иш-чараларынын алкагында, активдүү баш ийбөөгө жана бийлик өкүлдөрүнүн мыйзамдуу талаптарына каршы чыгып, массалык башаламандыкка чакырыктарды байма-бай жарыялап келген 1978-жылы туулган К.А.А. аттуу КР жараны аныкталып, кармалды.
Бул тууралуу УКМК басма сөз кызматы билдирет.
К.А.А. өзүнүн мыйзамсыз аракеттерин жашыруу үчүн «Facebook» социалдык тармагында фейк аккаунттарды колдонгон. Анын кошо, ал Кыргызстанда тыюу салынган «Хизбут-Тахрир» диний-экстремисттик уюмунун активдүү мүчөсү экени да аныкталды.
Учурда тергөө иштери улантылып, кошумча тергөө жана тиешелүү адамдарды аныктоо иш-чаралары жүрүп жатат. К.А.А. УКМКнын тергөө абагына киргизилди. УКМК мыйзамда массалык башаламандык уюштурууга жана кастыкты козутууга багытталган аракеттер үчүн 10 жылга чейин эркинен ажыратуу менен кылмыш-жаза жоопкерчилиги каралгандыгын эскертет.
